Suriname me Girmit
1873 se lae ke 1916 talak 64 jahaaj me 34,304 girmitya logan ke India se Suriname lawa gais rahaa. Isme se 11,512, paanch saal ke girmit ke baad, laut ke India chal diin.
Girmit ke jamana badlo
Netherlands me gulami 1863 me khatam bhais rahaa. Free karaa gais gulam logan aapan plantation chhorr ke chal diin aur 90 talak plantation ke band kare ke parraa. Kuchh plantation ke owner logan British Guinea se girmit khalaas kare waala Hindustani log ke bharti kar ke aapn plantation me kaam kare khatir laain. 1870 me Britain Netherlands ke Dutch Guinea khatir majduur ke India se bharti kare ke ijaajat diis.
5 June 1873 ke din, ek sailing jahaaj, Lala Rookh, 452 Girmitya logan ke lae ke, tiin mahina ke trip ke baad, Calcutta se Paramaribo pahuchis. Isme se lagbhag sab log Uttar Pradesh nai to Bihar ke rahin. Kuchh girmitya logan ii sochat rahin ki uu logan ke et tirat yatra pe ek jagha, jiske naam "Sri Ram" rahaa, pe lae jawa jaawe hae.
Suriname Hindustani badlo
Girmit khalaas kare waale Hindustani log ke India laute se discourage kare ke khatir, 1885 me Dutch sarkar, ii Hindustani log ke state-run plantation me free settlement rights aur 100 Dutch guilders diis. Lagbhag 23,000 Hindustani log Sriname me rahe gain. Kuchh din baad Hindustani log plantation ke chhorr ke aapan jamiin kharid ke dhaan ke boe suruu karin. uu log aapan larrkan ke parrhae lagin aur World War II ke baad Suriname ke Hindustani Dutch university se parr ke laute lagin aur achchhaa achchhaa kaam kare lagin.