Syria (jahaaj): ke revisions ke biich ke antar

Fiji aae se pahile ii jahaaj West Indies girmitya log ke lai jaae ke khatir kaam me lawa jaawat rahaa. Syria ke Fiji ke yatra uske khatir akhri yatra rahaa jab ki [[Suva]] se khali 4 mile duur ,etwar ke roj, [[11 May]] [[1884]] ke saarhe aath baje, Nasilai Reef ke uppar charr gais rahaa aur 49 logan mar gain. Ii Fiji ke sab se kharaab durghatna rahaa. Syria, Calcutta [[13 March]] 1884 ke 497 girmitya logan ke lae ke choris. Syria ke yatra bina koi ghatna ke rahaa jab ki uu Indian Ocean se Australia ke south me jaae ke huan ke hawa ke istemaal kar ke khaali 58 roj me Fiji ke nangich pahuncha. Jab jahaaj ke Captain [[Kadavu]] dekhis tab uu jaada hawa ke khatir allow nahi karis aur Syria, Nasilai Reef ke, Captain ke anumaan se, nangich rahaa. Saat baje raat taktalak puura chaand rahaa lekin koi bhi lookout, mast pe, nahi rahaa jon ki duur se reef ke uppar wave ke dekh leta.

Chhe me se paanch lifeboat duub gais aur chhatwa me crew log madat khoje ke khatir gain. Uu log Nasilai gaon pahuchin lekin kaiviti log ke samghae nahi pain ki konchij bhais rahaa aur uu log ke Suva ke jagahjagha [[Levuka]] lai jawa gais. Paanch baje sanjah ke Levuka pahunch ke ek rescue party taiyaar karaa gais jon ki Mangar (13 May) ke sabere rescue kosis suruu karin. Jab rescue boat Nasilai pauchis tab jaada girmitya log paani me rahin reef ke uppar aur jamin ke taraf jae ke kosis karat rahin lekin bahut log, jaada kar ke aurat aur larrkan log, jahaaj me rahin.

Jetna log jinda rahin uu log ke kaiviti log boat me Nasilai gaon lae gais. Aath baje raat ke rescue khalaas bhais. Duusar din sabere girmitya log ke Nasilai Immigration Depot aur huan se [[Nukulau]] lae jawa gais. Pachaas aur che girmitya aur tiin lascar log ke maut hoe gais rahaa. Agle dui hapta taktalak gyaarah aur log ke maut hoe gais.

<br/><br/>