Hibiscus

Hibiscus, ek rakam ke fuul waala perr hai jon ki Fiji me sab jagah pe hoe hai. Lag bhag 200 species ke hibuscus hai, lekin Fiji me sab se common hae laal hibiscus (Hibiscus rosa-sinensis) aur ii India se dunia bhar faela hai. Ii biswas karaa jaae hai ki, iske extract ke murr me lagae se baar kamti giri aur rusi bhi kamti hoe jaai. Hibiscus ke ek species South Korea ke national flower aur duusra, Malaysia ke national flower hai. Fiji me Hibiscus ke hedge banae khatir kaam me lawa jaae hai aur Suva me ek carnival ke naam ii fuul ke baad, Hibiscus Festival, rakkha gais hai.

Fiji ke laal Hibiscus

Hibiscus dher rakam ke rahe hai aur iske mala banae khatir, garden ke sundar kare khatir aur herbal cha me chhorre ke khatir kaam me lawa jaaa hai. Ek rakam ke Hibiscus, Kenaf (Hibiscus cannabinus) ke paper banae khatir use karaa jaae hai. Ek aur rakam ke Hibiscus, roselle (Hibiscus sabdariffa) ke Caribbean me herbal cha aur jam banawa jaae hai.

Mexico me ek rakam ke sarbat bhi Hibiscus se banawa jaae hai. Jon koi aapan weight kamti kare mange hai aur jiske kidney ke problem rahe hai iske dawai ke rakam pie hai. Mexico me jhurawal Hibiscus ke khawa jaae hai.

Egypt aur Sudan me bhi iske cha banae ke pia jaae hai.

Hibiscus ke perr ke chhilka ke Polynesia me skirt aur wig banawa jaae hai. Hawaii me aurat log ii fuul ke aapan baar me pahine hai, jisse ii jaana jaae sake hai ki uske saadi hoe gais hai ki nai.

India me Hindu log iske iske Kali aur Ganesh ke murti pe charrhae hai. Ujjar hibiscus ke Ayurvedic medicine me bhi kaam me lawa jaae hai. Souh India me laal Hibiscus (Hibiscus rosa-sinensis) ke baar me lagawa jaae hai jisse ki baar nai gire aur rusi kamti rahe hai.

National symbol

• Hibiscus syriacus, South Korea ke national fuul hai.
• Hibiscus rosa-sinensis, Malaysia ke national flower hai.