Hibiscus

Hibiscus, ek rakam ke fuul waala perr hae jon ki Fiji me sab jagha pe hoe hae. Lag bhag 200 species ke hibuscus hae, lekin Fiji me sab se common hae laal hibiscus (Hibiscus rosa-sinensis) aur ii India se dunia bhar faela hae. Ii biswas karaa jaae hae ki, iske extract ke murr me lagae se baar kamti giri aur rusi bhi kamti hoe jaai. Hibiscus ke ek species South Korea ke national flower aur duusra, Malaysia ke national flower hae. Fiji me Hibiscus ke hedge banae khatir kaam me lawa jaae hae aur Suva me ek carnival ke naam ii fuul ke baad, Hibiscus Festival, rakkha gais hae.

Hibiscus ke bahut kaam me lawa jaae hae

Hibiscus dher rakam ke rahe hae aur iske mala banae khatir, garden ke sundar kare khatir aur herbal cha me chhorre ke khatir kaam me lawa jaaa hae. Ek rakam ke Hibiscus, Kenaf (Hibiscus cannabinus) ke paper banae khatir use karaa jaae hae. Ek aur rakam ke Hibiscus, roselle (Hibiscus sabdariffa) ke Caribbean me herbal cha aur jam banawa jaae hae.

Mexico me ek rakam ke sarbat bhi Hibiscus se banawa jaae hae. Jon koi aapan weight kamti kare mange hae aur jiske kidney ke problem rahe hae iske dawai ke rakam pie hae. Mexico me jhurawal Hibiscus ke khawa jaae hae.

Egypt aur Sudan me bhi iske cha banae ke pia jaae hae.

India ke ek Hibiscus

Hibiscus ke perr ke chhilka ke Polynesia me skirt aur wig banawa jaae hae. Hawaii me aurat log ii fuul ke aapan baar me pahine hae, jisse ii jaana jaae sake hae ki uske saadi hoe gais hae ki nai.

India me Hindu log iske iske Kali aur Ganesh ke murti pe charrhae hae. Ujjar hibiscus ke Ayurvedic medicine me bhi kaam me lawa jaae hae. Souh India me laal Hibiscus (Hibiscus rosa-sinensis) ke baar me lagawa jaae hae jisse ki baar nai gire aur rusi kamti rahe hae.

National symbol

Hibiscus syriacus, South Korea ke national fuul hae.
Hibiscus rosa-sinensis, Malaysia ke national flower hae.