Wikipedia:Aaj ke featured article/October 2008
Aaj ke featured article ke archive
September 2008 - October 2008 - November 2008 - December 2008
Aaj Mangar, 16 Aprel, 2024 hai. Abhi ke time 15:53 hai
- October 1
Chandersen Chattur Singh ek Fiji ke Hindustani politician aur businessman rahaa. 1937 me uu Fiji me halchal machae diis jab ki uu A. D. Patel ke, Legislative Council ke election me North Western Indian Division khatir election me, harae diis jab ki Patel ke Vishnu Deo ke support rahaa aur uu ek wakiil bhi rahaa lekin Singh khali ek law clerk rahaa. Uske jiite ke khaas kaaran ii rahaa ki uu Fiji me paida bhais rahaa (Fiji-born) jab ki Patel India ke paida rahaa (India-born). Iske baad Singh aur dafe Legislative Council ke election larris lekin jiite nai paais. Singh, Panjabi aur Gujarati immigrants log ke Fiji aae ke virod karis. Uu Second World War me, jaada Hindustani leader log ke virod me, Hindustani log ke army me bharti hoe ke barrhawa diis aur aapan larrka ke bhi army me bharti karais. Uske bhaiya, Parmanand Singh, Fiji ke Legislative Council ke pahila Hindustani member me se ek rahaa. (aur...)
Pichhile tiin din ke featured article: Muniswamy Mudaliar – K. B. Singh – James Ramchandar Rao
- October 2
Ambalal Dahyabhai Patel (13 March 1905 - 1 October 1969), (jiske A. D. Patel ke naam se jaana jaat rahaa), A. D. Patel) , Fiji ke ek Hindustani wakiil aur politician rahaa. Patel, Fiji ke Legislatuve Council me 1944 - 1950 aur 1963 -1 969 tak rahaa aur uu Fiji ke sab se purana political party, National Federation Party, ke suruu karis rahaa. Patel, 1964 - 1966 tak Member for Social Services rahaa aur ii time uu dekhais ki uu aage dekhe waala admi rahaa jab ki uu Fiji ke rural area me library khole ke suruu karis, Fiji National Providend Fund ke suruu karis, jaati pe based unions log ke amalgamate kare ke kosis karis aur Fiji khatir ek University ke maang karis. Uu 1929 se 1969 tak aapan common roll ke mang pe atal rahaa. Uu Fiji ke ek barraa kisan ke union, Maha Sangh ke bhi suruu karis rahaa aur 1969 me kisan log khatir achchhaa cane contract dewais rahaa. (aur...)
Pichhile tiin din ke featured article: Chattur Singh – Muniswamy Mudaliar – K. B. Singh
- October 3
B. D. Lakshman, Fiji ke ek politician, businessman aur trade unionist rahaa. uu Fiji ke thora Hindustani me se ek rahaa jiske India jaae ke University me parrhe ke mauka mila. Bachelor of Arts aur Teaching ke degree paae ke baad uu khali thora din Fiji me parrhais. Is ke baad uu, Kisan Sangh, ke join kar liis aur iske support se uu 1940 me Legislative Council me chuna gais, lekin Sangh ke leader se differences ke kaaran uu 1944 ke election haar gais. Iske baad uu Chini Majdur Sangh ke organise karis aur aapan business me concentrate kare lagaa. 1959 tak, uu Fiji Industrial Workers Congress ke President ban gais rahaa aur Lautoka city Council ke member bhi ban gais rahaa. Uske fir se admii logan respect se dekhe lagin aur uu aapan purana seat ke 19 saal baad fir se jiit lis. Ek term ke baad uu politics se fir retire hoe gais aur aapan business me fir se concentrate kare lagis lekin political issues pe aapan vichar dete rahis. (aur...)
Pichhile tiin din ke featured article:A. D. Patel – Chattur Singh – Muniswamy Mudaliar
- October 4
Ayodhya Prasad, Fiji ke ek master, trade unionist aur politician rahaa. Uu Fiji me ganna ke kisan ke pahila union, Kisan Sangh, ke 1937 me suruu karis rahaa, jon ki 1940 me kisan log ke pahila dafe ganna supply kare ke ek contract dewais rahaa. Kisan Sangh ke dher support ke kaaran Prasad Legislative Council ke election me Sangh ke taraf se candidate ke kharaa karis aur baad me apne bhi dui term tak Legislative Council ke member rahaa. 1941 me A. D. Patel, ke ek duusra union suruu kare ke kaaran Prasad aur Patel me ganna ke contract khatir aur Legiskative Council ke election khatir dusmani bhais. Uske Alliance Party ke suruu kare me bhi haath rahaa aur uu ek party, National Congress of Fiji, ke suruu karis jisse ki Hindustani log Alliance Party me duusra jaati ke sathe barabar rahe lekin ii nai hoe paais jab Vijay R. Singh, Indian Alliance suruu kar ke Alliance Party me hindustani ke leader banaa. (aur...)
Pichhile tiin din ke featured article:B. D. Lakshman – A. D. Patel – Chattur Singh
- October 5
Pandit Ami Chandra Vidyalankar (1900 - 13 March 1954), Fiji ke ek sikchhak, union leader, soccer ke administrator aur Legislative Council ke member rahaa. Panditji, Fiji 1927 me, Arya Samaj ke school me parrhae khatir, aais rahaa. Uu Ba aur Suva me nawaa school bhi suruu karis rahaa aur Fiji ke Hindustani ke Hindi sikhe khatir saral Hindi me Class 1-4 khatir book bhi ikhis rahaa. Uu scouting aur football me bhi rahaa aur Ba Indian Football Association ke suruu karis rahaa. Uu Fiji Teaches Union ke bhi suru karis rahaa aur ii biswwas karat rahaa ki politics aur union ke alag rahe ke chaahi iske khatir uu 1952 me Fiji Industrial Workers Congress suruu karis rahaa. Sarkar uske aadar karat rahaa aur Legislative Council me uske nominate karis rahaa. (aur...)
Pichhile tiin din ke featured article: Ayodhya Prasad – B. D. Lakshman – A. D. Patel
- October 6
Leonidas, pahila jahaaj rahaa jisme girmitya logan ke India se Fiji lawa gais rahaa. Isse pahile ii jahaaj West Indies me girmitya log ke lai jae ke khatir kaam me lawa jawat rahaa. Leonidas, 3 March 1879 ke Calcutta chorris aur 72 din baad, 15 May 1879, ke Levuka pahuchis. Jahaaj me kul jorr 498 passenger rahin jisme 273 admi, 146 aurat aur 79 larrkan rahin. Leonidas ke Calcutta chorre ke khali tiin din baad kuch girmitya log ke haeja (cholera) aur kuch ke maata (smallpox) pakarr liis aur 17 log mar gain. Fiji pahuche pe Yanuca Lailai ke quarantine station banawa gais jahan pe 15 aur log dysentery, diarrhoea aur typhoid se mar gain. (aur...)
Pichhile tiin din ke featured article: Ami Chandra – Ayodhya Prasad – B. D. Lakshman
- October 7
Berar, Fiji me girmitya logan ke laae waala duusra jahaj rahaa. 29 June 1882 ke 424 girmitya log ke lai ke ii jahaj Calcutta se Fiji pahuja. Ii pahila jahaaj rahaa jon ke Nukulau ke quarantine station ke kaam me lais rahaa. Berar ke naam India ke west me ek jagah se rakha gais rahaa. Ii jahaaj 902 ton garrhu rahaa aur iske 1863 me Sunderland ke William Pile Tyser & Haviside khatir banawa gais rahaa. Fiji aae se pahile ii jahaaj ke New Zealand immigrant log ke lai jae khatir kaam me lawa jaat rahaa. 1896 me Berar, England ke coast par charr ke barbaad hoe gais. (aur...)
Pichhile tiin din ke featured article: Leonidas – Ami Chandra – Ayodhya Prasad
- October 8
Poonah, girmitya loag ke India se Fiji laae waala tiisra aur chutha jahaj rahaa. Poonaah pahila dafe 17 September 1882 ke 476 girmitya log ke lae ke Fiji pahucha. Ii trip me jahaaj ke tufaan ke saamna kare ke parraa aur iske lascar crew uppar deck pe jae se inkaar kar din rahaa aur thora baaki jahaaj duub jaata. Poonaah duusra dafe 19 June 1883 ke 495 girmitya logan ke lae ke Fiji pahucha. Ii trip me jahaaj me haeja (cholera) ke bemaari faila. Ii jahaaj 1199 ton garrhu rahaa aur 1867 me Tyser & Haviside iske William Pile at Sunderland ke khatir banais rahaa. Baad me ii jahaaj ke bech dewa gais rahaa aur iske naam badal ke Lief Drammen rakh dewa gais rahaa. (aur...)
Pichhile tiin din ke featured article: Berar – Leonidas – Ami Chandra
- October 9
Bayard 5th jahaaj rahaa jisme girmitya logan ke India se Fiji lawa gais rahaa. Ii jahaaj 67 metre lamba aur 1,028 ton garrhu rahaa aur iske 1864 me Hall Line khatir T. Vernon and Son banais rahaa. Iske 1881 me Foley and Company ke bech dewa gais rahaa. 20 August 1883 ke Bayard 494 girmitya logan ke lae ke Suva pahuchis. Isse pahile ii jahaaj, girmitya logan ke West Indies lae jae khatir kaam me lawa gais rahaa. Baad me ii jahaaj ke koila dhoe khatir South Georgia me kaam me lawa gais. Bayard 6 June 1911 ke roj aapan langarr tuurr ke South Georgia island ke south me patthar per charr gae aur huan par abhi talak parraa hai. (aur...)
Pichhile tiin din ke featured article: Poonah – Berar – Leonidas
- October 10
Inter-District Championship (IDC), Fiji Football Association ke calendar me sab se bhaari competition hai. Fiji ke sab district ke team ii tournament me, 1987 ke chhorr ke, 1938 se sab saal, Lloyd Farebrother Trophy khatir, soccer me bhaag lewe hai. Pahila IDC, jon ke Suva me 1938 me khela gais rahaa, me paanch team, Suva, Rewa, Ba, Lautoka aur Levuka, khelin rahaa. 1938 se 1975 tak, ii competition knock out format me khela gais rahaa lekin 1976 se pool play suruu karaa gais rahaa. 1985 se ii competition dui division me khela jae laga. 1999 me ek third division suruu karaa gais rahaa lekin ii bahut din nai chala. (aur...)
Pichhile tiin din ke featured article: Bayard – Poonah – Berar
- October 11
Ba football team, Fiji ke sab se achchha football team hai. Ii team 21 dafe Inter-District Championship (IDC) jiitis hai, aur jab ii dhyan me rakha jaae ke Ba, pahila dafe IDC khale 1961 me jiitis tab ii dekhae hai ki pichhle 50 saal me Ba Fiji ke football ke Ba ketna dominate karids hai. Ba aur tournament ke bhi aur sab team ke mukable me jaada dafe jiitis hais, jisme National Football League ke 32 me se 14 dafe, Battle of the Giants ke 31 me se 11 dafe, Fiji Football Association Cup Tournament ke 18 me se 7 dafe aur Champion versus Champion ke 17 me se 15 dafe jiitis hai. (aur...)
Pichhile tiin din ke featured article: Fiji me Inter-District Football – Bayard – Poonah
- October 12
Sashi Mahendra Singh (1920 - 1990), Fiji ke Ba district me ek businessman aur Ba town ke mayor rahaa lekin Fiji bhar ke log uske Ba Soccer Team aur Fiji National Team ke coach se jaane hai. Uu Ba aur Fiji team ke khilaarri aur ek referee bhi rahaa. Foootball ke alawa uu Hockey, Cricket, Tennis, Athletics, Boxing aur Rugby me bhi aapan yogdaan diis rahaa. Aapan politician, pitaji, Chattur Singh, ke sujhao pe Fiji ke kuchh Hindustani me se ek rahaa jon ki Second World War me army me bharti hoe gais rahaa. Iske baad uu aapan business suruu karis jisme auctioning aur motar ke spare parts ke business rahaa. Uu Ba Township Board ke Chairman bhi rahaa. (aur...)
Pichhile tiin din ke featured article: Ba ke Football Team – Fiji me Inter-District Football – Bayard
- October 13
Syria 6th jahaj rahaa jisme girmitya logan ke lae India se Fiji lawa gais rahaa, lekin Fiji me ii ek chattan pe charr gais rahaa. Syria 13 MArch 1884 ke 497 girmitya logan ke lae ke Cakcutta chhoris. 11 May ke, Suva se 4 mile duur ii Nasilai Reef be charr gais aur 49 log mar gain. Nasilai village ke kaiviti logan girmitya logan ke bachae me madat karin rahaa. Baad me 11 aur logan ke ii ghatna ke experience ke raaran mauthoe gais. Ii Fiji ke itihass me sab se kharaab sea disaster rahaa. (aur...)
Pichhile tiin din ke featured article: Sashi Mahendra Singh – Ba ke Football Team – Fiji me Inter-District Football
- October 14
Howrah 7th jahaj rahaa jisme girmitya logan ke lae India se Fiji lawa gais rahaa. Syria 13 MArch 1884 ke 497 girmitya logan ke lae ke Cakcutta chhoris. Ii jahaaj 26 June 1884 ke Fiji, 495 girmitya log ke lae ke pahuncha. Ii jahaaj ke naam Howrah, jon ke West Bengal me ek industrial city hai, se aais hai. Ii jaaah loha ke banaa rahaa aur 1,098 ton garrhu rahaa. Iske 1864 me Pile Spence and Company, Sunderland me banais rahaa. Fiji aae se pahile ii jahaaj England se New Zealand ke kahtir immigrant log ke lae ke jaat rahaa aur iske East Indies me girmitya log ke lae jae ke khatir bhi kaam me lawa gais rahaa. (aur...)
Pichhile tiin din ke featured article:Syria jahaaj – Sashi Mahendra Singh – Ba ke Football Team
- October 15
Pericles 8th jahaj rahaa jisme girmitya logan ke India se Fiji lawa gais rahaa. Pericles loha ke banaa 1,598 ton ke jahaaj rahaa. Fiji aae se pahile ii jahaaj London se Australia waala route me kaam me lawa jaat rahaa. Pericles 3 July 1884 me 461 girmitya log ke lai ke Suva pahuncha. Aate time jahaaj me cholera faila aur 35 jan bemaar hoe gais jisme se 20 log mar gain. 1904 me Pericles ke Norway ke bech dewa gais, aur iske dui aur time beche ke baad iske naam badal ke , 1916 me Sjurso rakha gae. Pericles ke 1923 me Kiel me tuurr ke bech dewa gais. (aur...)
Pichhile tiin din ke featured article: Howrah jahaaj – Syria jahaaj – Sashi Mahendra Singh
- October 16
Newnham Fiji me girmitya log ke lae waala 9th jahaaj rahaa lekin ii pahila jahaaj rahaa jon ki bhaap ke ingin se chalat rahaa. Ii jahaaj 1,296 ton garrhu rahaa. Ii Timor Sea ke rasta se khali 38 roj me 23 July 1884 me Suva pahucha. Timor Sea ke rasta se aae ke kaaran ii rahaa ki jahaaj thanda mausam ke chorr ke garam mausam waala rasta se Fiji aai aur kamti pneuminia aur bronchitis hoi, lekin ii jahaaj kharab se roll howat rahaa aur bahut jan ke maut hoe gais. Fiji Government paal waala jahaaj ke kaam me laae mangat rahaa kahae ki lamba trip se koi bemari ke incubate hoe ke time mile sake lekin CSR steam jahaaj mangat rahaa jisse ki Fiji pahuche waala tarik ke anumaan achchha se lagawa jae sake, girmitya log ke haal aur achchhaa rahe aur uu log ke Fiji me ganna kaate waala mausam khatir taiyaar rahe. (aur...)
Pichhile tiin din ke featured article: Pericles jahaaj – Howrah jahaaj – Syria jahaaj
- October 17
Main ek 1,691 ton, loha ke jahaaj rahaa jiske India se Fiji girmitya log ke laae khatir kaam me lawa gae rahaa. Ii jahaaj ke 1864 me Russel and Company, Nourse Line khatir banais rahaa. 30 April 1885 ke ii jahaaj 735 girmitya log ke lae ke Suva pahucha. Iske baad ii jahaaj ke West Indies girmitya log ke lae jae ke khatir kamm me lawa gae. 1910 me iske Norway ke bech dewa gae aur iske naam badal ke Vansa rakha gae. (aur...)
Pichhile tiin din ke featured article: Syria jahaaj – Pericles jahaaj – Howrah jahaaj
- October 18
Ganges 11th jahaaj rahaa jisme girmitya log ke Fiji lawa gais rahaa. Iske baad ii dui aur dafe girmitya logan ke lae ke Fiji aais. Ii Nourse Line ke duusra jahaaj rahaa jiske naam Ganges rahaa aur iske 1882 me Osbourne, Graham & Company of Sunderland banais rahaa. 27 June 1885 ke ii jahaaj 523 girmitya log ke lae ke pahila dafe, 3 September 1899 ke 464 girmitya logan le lae ki dusra dafe aur 21 June 1900 ke 554 girmitya logan ke lae tiisra dafe, Fiji aais. 1904 me iske Norway ke ek Company ke bech dewa gais rahaa aur iske naam badal ke Asters rakha gais. 28 May 1917 ke ii jahaj ke ek German submaribe Sicilly ke lage dubae dis (aur...)
Pichhile tiin din ke featured article: Main jahaaj – Syria jahaaj – Pericles jahaaj
- October 19
Boyne, 12th jahaaj rahaa jisme girmitya logan ke Fiji lawa gais rahaa. Ii jahaaj 1,403 ton garrhu rahaa, iske 1877 me banawa gais rahaa aur iske owner Nourse Line rahaa. Suruu me ii jahaaj ke New Zealand immigrant log ke lae jae khatir kaam me lawa jaat rahaa. 1882 me, Boyne, jab West Indies jaat rahaa, tab ek tufaan me fas gais aur ulte waala rahaa. Uske lascar aur captain uske chorr ke bhaag gain lekin jahaaj nai duuba. Is ke baad, jahaaj ke fir se banaae ke West Indies me girmitya logan ke lae jaae khatir kaam me lawa gais rahaa. 26 April 1886 ke roj ii jahaaj 537 girmitya logan ke lae ke Calcutta se Suva pahuchis, lekin India laute ke time ii chattan pe charr ke duub gais. (aur...)
Pichhile tiin din ke featured article: Ganges jahaaj – Main jahaaj – Syria jahaaj
- October 20
Bruce, 13th jahaaj rahaa jisme girmitya logan ke lae ke Fiji lawa gais rahaa. Ii ek 1,200 ton garrhu, ke paal waala jahaaj rahaa jiske 1866 me Glasgow ke Aitken Mansell banais rahaa. 1880 me iske Nourse Line kharid liis rahaa. 21 May 1886 ke Bruce 458 girmitya logan ke lae ke Fiji pahucha. Iske baad ii jahaaj ke West Indies me girmitya logan ke lae jae khaatir kaam me lawa gais rahaa. 18 February 1891 ke ii jahaaj New York harbour me duub gais rahaa, aur iske nikaal ke koila ke godaam khatir kaam me lawa gais rahaa. (aur...)
Pichhile tiin din ke featured article: Boyne jahaaj – Ganges jahaaj – Main jahaaj
- October 21
Hereford 14th jahaaj rahaa jisme gimitya log ke lae ke India se Fiji lawa gais rahaa. Iske baad ii jahaaj dui aur dafe Fiji aais. Ii jahaaj 1510 ton garrhu aur loha ke banaa paal waala jahaaj rahaa jiske 1869 me Glasgow ke J. Elder & Company, Merchant Shipping Company of London khatir banais rahaa. Suruu me iske New Zealand nawa immigrant logan ke lae jaae khaatir kaam me lawa gais rahaa. 1882 me ii jahaaj ke Nourse Line kharid liis aur iske West Indies girmitya logan ke lae jaae khatir kaam me lawa gais. Ii jahaaj Fiji pahila dafe 24 April 1888 ke 539 girmitya logan ke lae ke, duusra dafe 15 June 1892 ke 479 girmitya logan ke lae ke aur tiisra dafe, 28 June 1894 ke, 511 girmitya logan ke lae ke Fiji aais. 1898 me Hereford ke Norway ke bech dewa giais aur 1907 me ii Argentina ke nangich ek chattan pe charr ke duub gais. (aur...)
Pichhile tiin din ke featured article: Bruce jahaaj – Boyne jahaaj – Ganges jahaaj
- October 22
Moy 15th jahaaj rahaa jisme girmitya logan ke Fiji lawa gais rahaa. ii jahaaj 1,697 ton garrhu aur loha ke banaa, paal waala jahaaj rahaa jiske 1885 me Russel & Company, Nourse Line khatir banais rahaa. 3 May 1889 ke Moy 677 girmitya logan ke lae ke pahila dafe, 14 April 1893 ke 467 girmitya logan ke lae ke duusra daf aur 1 June 1898 ke 568 girmitya logan ke lae ke tiisra dafe Fiji pahucha. Iske baad ii jahaaj dui time aur Fiji aais aur West Indies bhi girmitya logan ke lae ke gais. Iske girmitya logan ke West Indies se India lautaare khatir bhi kaam me lawa gais. 1905 me jab ii jahaaj Guiana se lautat rahaa tab ii samundar me heraae gais. (aur...)
Pichhile tiin din ke featured article: Hereford jahaaj – Bruce jahaaj – Boyne jahaaj
- October 23
Rhone 16th jahaaj rahaa jisme girmitya logan ke India se Fiji lawa gais rahaa. Iske naam pahile Gilroy rahaa. Ii ek 1,768 ton garrhu, loha ke banaa, paal waala jahaaj rahaa jiske 1875 me Glasgow, Scotland ke John Elder, Dundee ke Gilroy, Sons & Company khatir banais rahaa. 1889 me iske Nourse Line karid ke iske naam Rhone kakkhis. Iske jaada kar ke girmitya logan ke dhoe khatir kaam me lawa jaat rahaa. 15 May 1890 ke Rhone 585 girmitya logan ke lae ke, pahila dafe aur 11 May 1897 ke 653 girmitya logan ke lae ke duusra dafe ii jahaaj Fiji pahucha. Iske baad ii West Inidies girmitya logan ke lae gais. Iske Girmitya logan ke West Indies se lautaar ke India lawe khatir bhi kaam me lawa gais rahaa. 1905 me iske Norway ke ek Company ke bech dewa gais aur iske naam badal ke Dybvaag rakkhaa gais rahaa. (aur...)
Pichhile tiin din ke featured article: Moy jahaaj – Hereford jahaaj – Bruce jahaaj
- October 24
Allanshaw 17th jahaaj rahaa jisme girmitya logan ke India se Fiji lawa gais rahaa. Ii ek 1,589 ton garrhu, loha ke banaa, paal waala jahaaj rahaa jiske 1874 me William Simons & Company, Liverpool ke J.G. Potter & Company ke khatir banais rahaa. 1880 me iske Nourse Line kharid liis rahaa. Iske jaada kar ke girmitya logan ke dhoe khatir kaam me lawa jaat rahaa. 17 June 1890 me Allanshaw 573 girmitya logan ke lae ke Fiji pahucha. Iske West Indies bhi girmitya logan ke lae jaae khatir kaam me lawa gais raha. 1890 me ii jahaaj duub gais. (aur...)
Pichhile tiin din ke featured article: Moy jahaaj – Moy jahaaj – Hereford jahaaj
- October 25
Danube, 18th jahaaj rahaa jisme girmitya logan ke India se Fiji lawa gais rahaa. Ii ek 1,459 ton garrhu paal waala jahaaj rahaa jiske 1890 me Nourse Line khatir banawa gais rahaa. Iske naam urope ke ke lamba naddi se aais hai. 15 June 1891 ke ii jahaaj 591 girmitya logan ke lae ke Fiji aais. Iske Trinidad bhi gimitya logan ke lae jaae khatir kaam me lawa gais rahaa. 1892 me, Danube, New York jaate time herae gais. (aur...)
Pichhile tiin din ke featured article: Allanshaw jahaaj – Moy jahaaj – Moy jahaaj
- October 26
Jumna, 19th jahaaj rahaa jisme girmitya logan ke India se Fiji lawa gais rahaa. Ii jahaaj 1,048 ton garrhu aur loha ke banaa, paal waala jahaaj rahaa jiske 1867 me Sunderland ke William Pile, Nourse Line khatir banais rahaa. Ii jahaaj ke jaada kar ke girmitya logan ke dhoe ke kaam me lawa jaat rahaa. 27 June 1891 ke ii jahaaj pahila dafe 447 girmitya logan ke lae ke aur, 23 May 1893 ke, duusra dafe, 310 girmitya logan lae ke Fiji aais. 1898 me iske Norway ke ek Company ke bech dewa gae rahaa. (aur...)
Pichhile tiin din ke featured article: Danube jahaaj – Allanshaw jahaaj – Moy jahaaj
- October 27
British Peer, 20th jahaaj rahaa jisme girmitya logan ke India se Fiji lawa gais rahaa. ii jahaaj 1428-ton garruh, 247.5 feet lamba, 36.4 feet chaurah aur 22.5 feet gahira, tiin mast waala, loha ke banaa paal waala jahaaj rahaa. Ii jahaaj ke 1865 me Belfast Ireland ke Harland and Wolff yards British Shipowners Company khatir banais rahaa. 183 me Nourse Lines ii jahaaj ke kharid liis rahaa. Jahaaj pe Catain ke saathe 22 aur lascar rahin. British Peer, 23 April 1892 ke, 527 girmitya logan ke lae ke, Fiji aais. Dui mahina baad ii jahaaj Suriname girmitya logan ke lae gais aur September 1894 me 450 girmitya logan ke St Lucia se India lautar ke lae gais. 1886 me ii girmitya logan ke lae ke South Africa gais rahaa. November 1894 me ii fir se Cape of Good Hope girmitya logan ke lae ke pahucha. 8 December 1896 ke roj ii Saldanha Bay, South Africa me ek reef ke uppar charr ke duub gais aur khali chaar logan bachin. 7 January 1897 ke Court of Inquiry dube ke kaaran Captain ke kasuur batais. British Peer ahi tak Saldanha Bay me 9 meter paani ke niche parra hai. (aur...)
Pichhile tiin din ke featured article: Jumna jahaaj – Danube jahaaj – Allanshaw jahaaj
- October 28
Avon, 21st jahaaj rahaa jisme girmitya logan ke India se Fiji lawa gais rahaa. Iiske naam pahile Dunolly rahaa. Ii jahaaj 1,572 ton garrhu, loha ke pbanaa, paal waala jahaaj rahaa. Ii jahaaj 255.6 feet lamba, 37.6 feet chaurra aur 22.6 feet gahira rahaa. Iske 1884 me Glasgow ke Charles Connell, John Brown khatir banais rahaa. Nourse Line, Avon ke 1890 me kharid liis aur iske naam badal ke River Avon ke naam rakhaa gais. Iske jaada kar ke girmitya logan ke colonies me lae jaawe khatir kaam me lawa jaat raha. Avon, 5 May 1892 ke 520 girmitya logan ke lae ke pahila dafe aur 25 July 1899 ke 467 girmitya logan ke lae ke duusra dafe Fiji aais. (aur...)
Pichhile tiin din ke featured article: British Peer jahaaj – Jumna jahaaj – Danube jahaaj
- October 29
Arno, 38th jahaaj rahaa jisme girmitya logan ke India se Fiji lawa gais rahaa. Ii jahaaj 1,825 ton garrhu, loha ke aur paal waala jahaaj rahaa. Iske lambai 270.7 feet, chaurrai 39 feet aur gahirai 22.5 feet rahaa aur iske 19 January 1893 ke launch karaa gais rahaa. Iske Glasgow ke Charles Connell & Company, Nourse Line khatir banais rahaa. Iske jaada kar ke British colony me girmitya logan ke lae jae khatir kaam me lawa jaat rahaa. Ii pahila dafe 23 July 1900 ke, 627 girmitya logan ke lae ke, duusra dafe 4 September 1903 ke, 634 girmitya logan ke lae ke aur tiisra dafe 3 May 1904 ke, 634 girmitya logan ke lae ke Fiji aais. 1896 me ii jahaaj West Hartlepool me chattan ke uppar charr gais rahaa. Arno ke 1910 me Norway ke ek Company ke bech dewa gais rahaa. 10 October 1913 ke ii jahaaj Fredrikstad se Pernambuco ke trip me herae gais. (aur...)
Pichhile tiin din ke featured article: Avon jahaaj – British Peer jahaaj – Jumna jahaaj
- October 30
Rhine, 39th jahaaj rahaa jisme girmitya logan ke India se Fiji lawa gais rahaa. Ii jahaaj 1,691 ton garrhu, loha ke banaa paal aala jahaaj rahaa jiske Port Glasgow ke Russel & Company, Nourse Line khatir banais rahaa aur jiske 10 December 1885 ke launch karaa gais rahaa. Ii jahaaj 257.2 lamba, 38.3 feet chaurra aur 23.1 feet gahiraa rahaa aur iske naam Germany ke Rhine Naddi se aais hai. Iske jaada kar ke girmitya logan ke British colonies me lae jae khatir kaam me lawa jaat rahaa. 30 August 1900 ke Rhine 491 girmitya logan ke lae ke Fiji aais rahaa. (aur...)
Pichhile tiin din ke featured article: Arno jahaaj – Avon jahaaj – British Peer jahaaj
- October 31
Fazilka, 40th jahaaj rahaa jisme girmitya logan ke India se Fiji lawa gais rahaa. Ii jahaaj 4,152 ton garrhu steamship rahaa jiske lambai 366 feet, chaurrai 48.2 feet aur gahiarai 26.5 feet rahaa. Iske William Doxford and Sons, British-India Steam Navigation Company (B.I.S.N.) khatir 1890 me banais rahaa. Iske engine 462 nhp ke rahaa aur ii 12.5 knots ke speed pe chale sakat rahaa. Iske naam North India ke ek town se aais hai. Ii jahaaj 1904 me immigrants log ke lae ke London se Brisbane aais rahaa lekin iske jaada kar ke girmitya logan ke British colonies me lae jae khatir kaam melawa jaat rahaa. Boer War ke time iske soldier logan ke India se South Africa lae jae khatir kaam me lawa gais rahaa. 1919 me Nicobar Island ke lage ii jahaaj duub gais (aur...)
Pichhile tiin din ke featured article: Rhine jahaaj – Arno jahaaj – Avon jahaaj
Aaj ke featured article ke archive
September 2008 - October 2008 - November 2008 - December 2008
Aaj Mangar, 16 Aprel, 2024 hai. Abhi ke time 15:53 hai